Blind date og fleira skemmtilegt

Jæja, haldiði ekki að ég og minn íðilfagri foli hafi komið Kokksa á blint stefnumót núna seinustu helgi. Og viti menn?! Það var eiginlega ekki hægt að draga upp verri lúða en þann sem mætti á svæðið. Sko, í fyrsta lagi var hann algerlega ógreiddur, og þá er ég ekki að tala um ,,sexy just out of bed hair" eða ,,just came from the shower and I am too sexy for my hairbrush" hárgreiðslu ..... ó nei, það var sko ekkert í þá áttina. Heldur var hárið á honum strítt og útum allar áttir. Það benti bæði í suður og austur og gott ef það var ekki Norðvestan átt í hárinu á honum líka. Hann var líka klæddur í vængjapeysu sem var í tísku árið 1983 og ég er alveg viss um að peysan var ekki deginum yngri en 22ja ára. Hann sat síðan hokin í baki allan tímann og hafði ekkert að segja. Manngreyið skildi svo ekkert í íslenska aulahúmornum sem var viðhafður við borðið. Það skondnasta við þetta var að manngreyið hélt því fram að hann væri hinn mesti womaniser og færi létt með að ná sér í hvaða dömu sem er..... Kokksi hljóp öskrandi í burtu og núna er Kokksa shaped hole á veggnum á Oliver. Minn íðilfagri gullinhærði ástarguð er semsagt hér með leystur frá störfum sem hjónabandsráðgjafi og stefnumótafrömuður.
Annars er Forski aftur farin að forska og það af mikilli ástríðu. Núna þýðir ekkert annað en að borast ofan í bókmenntafræði kenningar og rýna í texta með fagmannlegu yfirliti. Núna þýðir sko ekkert elsku amma og að hafa einhverja samúð með Pollíönu eða Önnu Frank. Núna verður allt greint í tætlur með nútímalegri nýrýni sem ég er að hugsa um að hanna alveg útfrá sjálfri mér. En það er að greina textan útfrá maskúlínískum klínískum og pólitískum aðferðum og skeyta hvorki um lesgildi né fagurfræðilegt umhverfismat. Eitthvað í þá áttina. Ég fæ þetta örugglega birt í Skírni í vor eins og Móðir jörð verður svo fræg fyrir. Annars frétti ég frá henni í dag að hún er að setja saman útvarpsþátt þar sem hún ætlar að segja selasögur á milli þess sem hún ætlar að baula (eða jarma) eins og selur og líkja eftir dýrinu í háttum öllum. Það verður ansi fróðlegt að heyra þann útvarpsþátt á sunnudagsmorgnum.
Jæja, best að halda áfram að lesa um uppreisnina gegn bókmenntafræðikenningunum á 20. öld. Þetta er æsispennandi lesning. Mig langar svo að vita hvort uppreisnin tekst eða ekki.