Post summercakeparty

Forskaren er algjörlega orðin sannfærð um að Pan hafi yfirtekið sál og líkama undanfarnar tvær vikur. Pan verður ærslafullur og lætur öllum illum látum á nóttinni og það hefur einmitt gerst hjá mér seinustu tvær vikur. Ég sem fer aldrei neitt, en ég er gjörsamlega búin að mála bæinn rauðann (eða þannig, en ég er ekki frá því að það fylgir oflæti að vera undir álögum Pans). Fyrst æðir maður út á árshátið og endar uppi á sviði baulandi eins og belja í beljubúning og svo næstu helgi fer maður í rokkælukökuboð. Og það er í fyrsta sinn sem ég verð vitni af kökuboðsgesti drekka viskíið sitt með marenstertu. Annars var sumargleðin hennar Grumpu seinasta laugardag með eindæmum skemmtilegt og allir virtust skemmta sér vel og halda haus að auki. Skemmtiatriði eins og Nitro var á sínum stað og bæði kvenrembur og karlrembur skiptust á skoðunum langt fram eftir nóttu.Í fyrsta sinn í langan tíma virtust fleiri karlmenn en konur mæta og þótti það að sjálfsögðu ekkert verra fyrir einhleypa konu sem er undir áhrifum Pans. Forskaranum er reyndar farið að líða svolítið eins og geit á vorin sem hleypur út um alla haga. En ég læt nú reyndar bara nægja að hlaupa á brettinu í Nautilus við og við. Annars er þetta nú ekki allt búið því að Forskaren fór líka á Robert Plant tónleikana í Laugardalshöll á föstudagskvöldinu. Og viti menn, eftir að ég og vinirnir voru komin inn í sal að horfa á eitthvað stórskrítið upphitunarband, haldiði þá ekki að Bobby Plant hafi birst frammi í andyri í bananabúning sem dulargervi og stillt sér upp fyrir ljósmyndarann. Forskaren er að sjálfsögðu ansi sár fyrir að hafa misst af þessu einstaka tækifæri. En hann kemur kannski aftur eftir 35 ár. Hver veit. Annars er Forskaren búin með tískuritgerðina sem fjallar um Panhópinn í rokkælutights. Núna er bara að byrja á þróunarkennignu Darwins og hvernig hún var túlkuð út frá ríkjandi samfélagsviðhorfi. Kannski fer Forskaren þá endanlega yfirum og endar niðri í Nauthólsvík að leita að Geirfuglinum.

Gleðilegt sumar!

Núna er Forskaren næstum því búin með ritgerðina um Pan og er orðin sérfróður í Eros og ástarbralli Pans. Annars er það nú að frétta að Forskarinn brá sér í betri skóna seinasta laugardag og fór á árshátið hjá Hagar, stórkompaníis Ásgeirs og Co. Forskaren ætlaði nú bara í matinn og fara svo heim að lesa Astrid Lindgren, en var í staðin dregin upp á svið til að leika búkollu. Forskaren ætlaði nú ekki að íklæðast beljubúning með slaufu án þess að drekka nokkur vínglös og einn martini bianco...og síðan var ekki aftur snúið. Það var svo gaman á barnum að Forskaren endaði á öldurhúsi niðri í bæ, þar hitti hún fyrir föngulegan karlmann frá New York sem varð á því að spyrja sakleysislega hvernig það væri að læra menningarfræði. Aumingja maðurinn var svo vitlaus að biðja mig að segja sér meira um fræðin og hann var ismaður til dauða á tveimur tímum. Það eina sem Forskaren lærði um manninn frá Eplinu stóra var að upphaflega kom hann frá Ohio. Í lokin hljóp hann öskrandi í burtu í bókstaflegri merkingu. En Forskaren var einstaklega ánægður með sitt hlutskipti. Hverjir eru betri til að isma til dauða en kurteisir drengir frá Ohio? En ekki er öll gleði á enda því að Forskaren á eftir að fara í sumargleði sem haldin verður hjá Grumpu gleðigjafa næsta laugardag. Þar verða vonandi ekki grænir kokteilar í boði svo að gestir fari ekki ælandi heim eins og komið hefur fyrir. En ég frétti víst að Grumpa hafi náð sér í föngulegan karlmann í fjörunni á Seltjarnarnesi á dögunum. Þar var hann að synda alls nakinn í sakleysi sínu í árlegu Viðeyjarsundi. En Grumpa óð út í og náði karli með klækjum og kokteilum. Það verður gaman að sjá hvernig fengurinn lítur út. Annars er nú sumardagurinn fyrsti í dag og ég hef ekki heyrt í einni einustu skrúðgöngu, engri lóu og ekki séð eitt einasta snjókorn. En það er væntanlega ástæðan fyrir því að hátíðarhöldunum var frestað. Það vantar allan snjóinn og rokið. Sjáumst hress á laugardag í sumargleði hjá Grumpu!

Ritgerðarsmíð II

Forskaren er að drukkna í verkefnum, en situr samt hérna uppi á fjórðu hæð í Þjóðarbókhlöðunni og skrifar á bloggið. En einhverstaðar verður maður að fá frið til að veita hugsunum sínum útrás og segja eitthvað af viti. Núna eins og er, er Forskaren að skrifa ritgerð um Pan. Pan var guð hirðingjanna í forngrískri goðafræði og var semsagt hálfur maður og hálfur geit. Hann er æstur og lostafullur á daginn og á næturnar getur hann hrætt úr fólki líftóruna vegna ærslagangs. En þaðan kemur orðið Panic. Ég er semsagt í algjörum Panik núna því að ég kem bara ekki einu anskotans orði niður á blað í þessari annars mjög svo áhugaverðu ritgerð. Kannski veit Pan að ráðagerð minni og hefur plantað sér úti í horni í herberginu mínu og sett í mig panik. Það er kannski ástæðan fyrir þessum flautuleik sem ég heyri endalaust í hausnum á mér þegar ég er að reyna að skrifa eitthvað. Pan spilaði á flautu og dansaði úti á engi á daginn. Ég finn einmitt til mikillar löngunar til að dansa þessa dagana og mér finnst ég með eindæmum lostafull og þokkaleg þessa vikuna. Mig langar helst til að liggja undir tré (hvar sem það finnst nú hér á Íslandi) og faðma að mér þokkafullan karlmann (ég veit reyndar alveg hvar hann finnst). Ekki hjálpar veðrið þar sem sólin er komin hátt á loft og gott ef hitinn er ekki komin alla leið upp í 3 stig °C og allir að stikna úr hita. Ég ætla að biðja til Seifs og athuga hvort hann geti gert eitthvað í þessu. Hvort hann geti ekki skellt svona eins og einum snjóbyl yfir höfuðborgina svo vorhugurinn hverfi í bili ásamt þessum dagdraumum um að ég sé að dansa úti á engi með honum Pan.

Próflestur og ritgerðasmíð

Jæja, nú eru páskarnir búnir, Bobby Fischer orðin Íslendingur sem finnst skemmtilegast að versla í Hagkaup og Páfinn látinn. Hvað gerist eiginlega næst? Fer Tensai San kannski að lesa bókmenntir frá miðöldum? og fer Grumpa kannski að spila tölvuleiki? Og hvað ef Monopoly gengur í Sjálfstæðisflokkinn? Móðir Jörð flytur á mölina, Hammer fer að fíla Tom Hanks? Og Kokkálaði kokkurinn hættir að styðja Davíð? Annars er nú ýmislegt að frétta síðan síðast, Forskaren og Grumpa hittust blaðskellandi á kaffihúsi/öldurhúsi/veitingarhúsi í 101 yfir páskana og skipulögðu skemmtanahöld út árið. Nú er dagatalið útfyllt af ýmsum gleðiskap og sá fyrsti verður núna þ. 23. apríl hjá Grumpu (að sjálfsögðu). Þar verður ýmislegt gert sér til dægrastyttingar eins og að fagna sumrinu ,sem hefur reyndar ekki komið á Íslandi síðan Ingólfur kallinn villtist á leiðinni í frí til Flórída og strandaði í staðin í fjörum landsins. En hvað um það. 10 stiga hiti og slydda telst víst til sumars á Íslandi og hver er svosem ekki alveg sáttur við það? Maður fer bara niður í Nauthaulsvík sem er upphitaður fermetir. Þar er hægt að liggja í fósturstellingunni í sólbaði í bikininu sem var keypt á Norrænu 1989..... Annars hefur Forskaren líka heyrt að Móðir Jörð sé farin að tala við bækurnar í Þjóðarbókhlöðunni og gott ef þær eru ekki farnar að svara henni líka. Tensai San og Hammer eru eitthvað mikið að bralla í 101 og frést hefur að Kokkálaði kokkurinn stefni að frægð og frama sem kokkur í sveitinni og að hann sé að hanna uppskrift af smákökum sem eiga að heita í höfuðið á Kokksa. Af Forskaranum sjálfum er það að frétta hann og Monopoly eru búnir/ar að sækja um sem fréttastjórar á RÚV.